उसले जस्तै तिमी पनि

निन्द्रा, तिर्खा सबै भुल्छु,
तिमीसँग बोल्दा खेरी,
सपनाहरु बुन्न थाल्छु एकान्तमा,
तर भन्न डर लाग्छ,
किनकि थाहा छ मलाई भविष्यमा,
दुख्न सक्छ मलाई फेरि !

तिमीजस्तै उसँग नी,
बोलिराख्न मन लाग्थ्यो,
उसँग नी तिमी जस्तै,
भेट्नु पाउँदा खुशी लाग्थ्यो,
तिमीलाईजस्तै उसलाई पनि,
सबै कुरा भन्ने गर्थेँ,
उसले पनि तिमीजस्तै,
ध्यान दिएर सुन्ने गर्थी !

तिमीजस्तै उसले पनि,
रमाइला सपना देखाउँथी,
ऊ पनि तिमीजस्तै,
साथ दिने कसम खान्थी,
तिमीजस्तै उसले पनि,
आफ्ना सपनामा मलाई राख्थी,
ऊ पनि तिमीजस्तै,
कैल्यै छोडी जान्न भन्थी!

त्यसैले डर लाग्छ मलाई !

उसले जस्तै तिमीले पनि,
दोबाटोमा छोडीदिन्छौ कि,
उजस्तै तिमी पनि,
अपरिचित भइदिन्छौ कि,
आज माया गर्छु भनी,
भोलि टाढा गइदिन्छौ कि,
तिम्रो पनि उसको जस्तै,
मन एकदिन बदलिन्छ कि !

– सागर घर्ती