Register
A password will be e-mailed to you.

सवारी चालक अनुमतिपत्र नविकरण प्रक्रिया: [ License Renewal Process]

एक दुइ जनाले भनेको सुनेकी थिएँ, लाइसेन्स नविकरण आफैं गर्न सकिन्न, अरुलाई पैसा दिएर गर्नुपर्छ । आफैं नविकरण गर्न जाँदा बुझें, यो धेरै हद सम्म सत्य रहेछ । अव्यवस्थित र अस्तव्यस्त यातायात व्यस्था कार्यालयमा लाइसेन्स नविकरण गर्न जाँदै हुनुन्छ भने दिन माया मारेर र घन्टौं लाइनमा बस्ने मनस्थिति बनाएर निस्किए बेस हुने रहेछ ।

चाहिने कागजात र सामग्री :

१. सवारी चालक अनुमतिपत्र नविकरण फारम
२. मेडिकल जांच फारम
३. पासपोर्ट फोटो – १
४. पुरानो लाइसेन्स (यो लाइसेन्स बागमती अन्चल बाट नै जारि भएको हुनुपर्छ । अन्य अन्चलबाट जारि भएको लाइसेन्सको नविकरण हाललाई रोकिएको छ। पांच वर्ष तिन महिना म्याद नाघेमा डबल राजस्व तिर्नुपर्छ।)
४. टिकट – रु दस मुल्यको
५ . रू ७६५
६. ग्लु र स्टेप्लर
७. डटपेन

 

प्रक्रिया:

१. यातायात व्यवस्था कार्यालय, एकान्तकुनामा साढे दस बज्नु अगावै पुग्नुहोस् ।

२. मूल ढोकाको देब्रे पट्टि सानो टहरामा नविकरण फारम र मेडिकल जांच फारम किन्नुहोस् । दुइटा गरेर रु १० पर्छ ।

३. “फारम भर्दिउँ? पचास रूप्पे मात्र” भनेर घेर्दै आउने महानुभावहरुलाई आँखा तर्नुस् ।

४. दस रुपियाँ बराबरको हुलाक टिकट किन्नुस् । यसलाई वहाँले रु १५ तिर्न लगाउनुहुन्छ । “सुन्धाराबाट बोकेर ल्याएको” ले यसो भएको रे !

५. दुवै फारम भर्नुस् । टिकट र फोटो टाँस्नुस् ।

६. फारम र लाइसेन्स बुझाएर गेटमै रहेको सानो कोठाबाट मेडिकल जांचको लागि चिर्कटो लिनुहोस् । मुल्य रु ३८ तोकिएको छ तर वहाँले रु ४० लिनुहुन्छ । किन भनेर प्रश्न नगर्नुहोस, उत्तर आउँदैन ।

७. एक र दुइ नम्बरको कोठामा फारम र लाइसेन्स जांचिन्छ । आफ्नो फारमहरु, मेडिकलको चिर्कटो र लाइसेन्स स्टिच गरेर यी मध्ये यौटा कोठाको झ्याल बाट दिनुस् । कहिलेकाहीं एकजना कर्मचारीले बाहिरै फारम बटुल्नुहुन्छ तर वहाँ प्राय हराउनु हुन्छ ।

८. फारम बुझाए पछी कान थापेर बस्नुस् । लगभग १५ मिनेट जतिमा नाम बोलाउन शुरु हुन्छ । आफ्नो फारम फिर्ता लिनुस् र अधिकृतको सही भए नभएको जाँच्नुहोस् ।

९. दुइ नम्बरकै छेउमा फलामे ग्रिल अगाडी फोटो खिच्ने कोठा छ। यसको अगाडी लाइन बस्नुहोस् । यो लाइनमा कम्तिमा आधा घन्टादेखि बढीमा ३ घन्टासम्म बस्नुपर्छ । लाइनमा बिच बिचबाट कसैले घुसपैठ नगरोस् भनेर जांच गर्न थुप्रै अधिकृत बस्नुहुन्छ । वहांले अरुलाई त गालि गर्नुहुन्छ, आफ्ना चिनजानका जति चाहिं सबैलाई छिराउनुहुन्छ । त्यसैले आफ्ना अगाडिका मान्छे थपिदै गए आश्चर्यमा नपर्नुहोस् ।

१०. पालो आएपछि एकचोटीमा पांच जनालाई फोटो खिच्ने कोठामा प्रवेश गराइन्छ । भित्र गएर मेचमा बसेपछी औंठाछाप लिइन्छ, फोटो खिचिन्छ र सही गर्नुपर्छ । यो सबै डिजिटल भएकाले र यो कोठा अरुभन्दा व्यवस्थित भएकाले केहि खुशी लाग्छ । पहिलेको लाइसेन्समा केहि गल्ती भएको भए यहाँ सच्याउन मिल्छ ।

११. यसपछि मेडिकल जाँचका लागि कोठा नम्बर १२ मा जानुस् । यहाँ ढोकैमा एकजना दिदीले रंगीबिरंगी बुट्टामाझका अक्षर पढ्न लाउनुहुन्छ । त्यसपछि मेडिकल सकियो । भित्र कोठामा छिरेपछि दुइजना अधिकृतले नम्बर दर्ता गर्नुहुन्छ ।

१२. अब नम्बर ८ कोठाको झ्यालमा सबै कागजात पेश गर्नुहोस् । वहाँले ढड्डामा हेरेर लाइसेन्स भेटिए सहि गरेर फिर्ता दिनुहुन्छ ।

१३. नम्बर ७ को झ्यालमा राजस्व (रु ७००) बुझाउनुहोस् । हरियो स्लिप लिनुहोस् । यहाँ लागु पदार्थ सेवन नगर्नुहोस् किनभने झ्यालमाथि ‘लागु औषध निषेधित क्षेत्र’ टाँसिएको छ ।

१४. नम्बर ९ को झ्यालमा सबै कागजात दिनुहोस् । वहांले अरु राखेर एउटा गुलाबी स्लिप र लाइसेन्स फिर्ता दिनुहुन्छ ।

१५. तपाइंले युद्ध जित्नुभो । अब १५ दिनपछि गएर लाइन लागेर स्मार्ट लाइसेन्स लिनुहोस् ! कहाँ गएर लिने भनेर नसोध्नुस्, किनभने उत्तर आउँछ, “पढ्न आउन्न? त्याँ माथि लेखेको देख्नुन्न?”

Am  I Nepali?

RECAP:

1. Buy license renewal/medical forms and ticket.
2. Fill in the forms,paste photo and ticket.
3. Buy medical examination slip.
4. Staple both forms, license and medical examination slip and submit at room 1 or 2.
4. Stand in line in front of the photo room.
5. After photo is taken, go to room 12 for medical exam.
6. After exam, go to room 8 to get license checked.
7. Go to room 7 to pay taxes. Receive green slip.
8. Go to room 9 to submit all documents and get back the pink slip.

 

(As of April 3, 2016)

Leave a Reply