जीवन

जीवन त एकै छ एकै हो
पल हजारौ बनाउन सकिन्छन
कोहि हिँडिरहन्छन हिम्मतका पाइला चालेर
कोहि एक कदममै रोकिन्छन् ।

यो पृथ्वी घुम्नुमा सबको भुमिका छ
यो हावामा सबको भाग छ
बेकाम कुरा त भगवानले शृजना गर्दै गर्दैनन्
निकम्मापन त मानविय आविष्कार हो,
जब सम्म आफुभित्र आफुमाथि विश्वास रहन्छ
बाटो त कसैले छेक्नै सक्दैनन्।

कहिलेकाहिं लडिन्छ
लडिन्छ तब त अगाडि बढिन्छ,
भुइमा पछारिनेहरुले जति
आफ्नो औकात चिन्ने मौका कसले पाउँछ ?
पछारिएर उठ्नेहरुले जति
आफ्नाहरु चिन्ने मौका कसले पाउँछ ?
प्रगति एक हौसला हो भने
दुर्गती पनि त एक पाठ हो
भनिन्छ
मिल्नेवाला छैन सतहमै हिराको खानी
सिकेर कहिल्यै खेर जान्न जवानी ॥

Photo: Pixabay/ Fotorech

कसैको शीघ्रता व्यापक हुन सक्छ
कसैको चाल सुस्त हुन सक्छ
कसैका कदम ठूला चल्न सक्छन्
कसैका साना हुन सक्छन्
तर हिडिरहने मान्छे पुगेरै छोड्छ
कछुवले जितेको त कथा नै छ हामीसंग,
भनिन्छ
दौड्ने गोडालाई शरिरले थिच्दैन
उड्ने चरालाई पखेटा भारि हुँदैन।

हामीसंग “जीवन” छ
मुटु चलिरहेछ,सांस छ
टेक्ने धर्ती छ,माथि आकाश छ
यो भन्दा ठूलो कुरा के हुन सक्छ।
हामी तब सम्म हार्नु हुन्न
जब सम्म मर्दैनौँ
हामी तब सम्म मर्दैनौँ
जब सम्म कसैको यादमा रहिरहन्छौँ।

– © निरज पन्त